Tinuligsa Ang Mga Anak na Babae ng Sion

Bukod dito, wika ng Panginoon:

Dahil sa mapagmataas ang mga anak na babae ng Sion,
at nagsisilakad na tuwid ang mga leeg at nang-aakit ang mga mata,
nagsisilakad at pakendeng-kendeng habang yumayaon
upang patunugin ang mga palamuting nasa kanilang mga paa—

Samakatwid tatakpan ng Panginoon ng langib
ang bao ng ulo ng mga anak na babae ng Sion,
at tutuklasin ng Panginoon ang kanilang mga lihim na bahagi.

Sa araw na yaon ay aalisin ng Panginoon
ang gayak ng kanilang mga hiyas sa paa,
at ang mga kuwintas, at ang mga hiyas na anyong kalahating buwan;

Ang mga hikaw at ang mga pulseras,
at ang mga belo;

Ang mga laso sa buhok,
at ang mga hiyas sa bukung-bukong;
at ang mga pamigkis,
at sisidlan ng pabango,
at ang mga hikaw;

Ang mga singsing,
at hiyas na nakasabit sa ilong;

Ang mga pabagu-bagong kasuotan,
ang mga balabal,
at ang mga kapa,
at ang mga supot;

Ang mga salamin,
at maiinam na lino,
at ang mga turban,
at ang maluluwang na tunika.

At ito ay mangyayari,
sa halip na masamyong halimuyak ay masamang amoy;
at sa halip na pamigkis sa baywang ay lubid,
at sa halip na maayos na buhok ay pagkapanot;
at sa halip na mainam na bata
ay batang magaspang;
hero sa halip na kagandahan.

Ang iyong kalalakihan ay mangabubuwal sa pamamagitan ng espada at ang iyong matatapang naman ay sa digmaan.

At ang kanyang mga pintuan ay mananaghoy at magdadalamhati;
at wasak siyang
uupo sa lupa.

At sa araw na yaon,
hahawakan ng pitong babae ang isang lalaki, nagsasabing:

Kakainin namin ang sarili naming pagkain,
at isusuot ang sarili naming damit;
tawagin lamang kami sa iyong pangalan
upang maalis ang aming kadustahan.