Ang Liwanag at Buhay

Mosiah 16:6

Kung hindi dahil sa pagparito ni Cristo, hindi magkakaroon ng pagtubos.

At ngayon, kung si Cristo ay hindi pumarito sa daigdig, tumutukoy sa mga bagay na darating na para bang dumating na ang mga ito, ay hindi sana magkakaroon ng pagtubos.

Mosiah 16:7–8

Pinapangyari ng kamatayan ni Cristo ang pagkabuhay na mag-uli, samakatuwid, nagagapi ang kamatayan at libingan.

At kung si Cristo ay hindi bumangon mula sa patay, o nagkalag ng mga gapos ng kamatayan upang hindi magtagumpay ang libingan, at hindi magkaroon ng tibo ang kamatayan, ay hindi sana magkakaroon ng pagkabuhay na mag-uli. Subalit may pagkabuhay na mag-uli, samakatwid, hindi nagtagumpay ang libingan, at ang tibo ng kamatayan ay nalulon kay Cristo.

Mosiah 16:9

Siya ang walang hanggang ilaw at buhay ng sanlibutan.

Siya ang ilaw at ang buhay ng daigdig; oo, isang ilaw na walang hanggan, na hindi maaaring magdilim; oo, at isang buhay rin na walang hanggan, na hindi na maaaring magkaroon pa ng kamatayan.

Mosiah 16:10-11

Sa isang walang kamatayan, at hindi nabubulok na kalagayan, tayo ay dadalhin sa paghuhukom ng Diyos, at tumanggap ng walang hanggang buhay at kaligayahan o kapahamakan.

Maging ang may kamatayang ito ay mabibihisan ng kawalang-kamatayan, at ang may kabulukang ito ay mabibihisan ng walang kabulukan, at dadalhin upang tumayo sa harapan ng hukuman ng Diyos, upang hatulan niya alinsunod sa kanilang mga gawa maging mabuti man yaon o maging yaon man ay masama— Kung sila ay mabubuti, sa pagkabuhay na mag-uli ng buhay na walang hanggan at kaligayahan; at kung sila ay masasama, sa pagkabuhay na mag-uli ng walang hanggang kapahamakan, na ibibigay sa diyablo, na siyang sumakop sa kanila, na kung alin ay kapahamakan—

Mosiah 16:12

Ang mga isinumpa ay mamumuhay ayon sa kanilang mga sariling makamundong kagustuhan, itinatanggi ang awa ng Panginoon, at hindi nagagawang magsisi.

Na humayo alinsunod sa kanilang sariling mga makamundong kagustuhan at hangarin; na hindi kailanman nanawagan sa Panginoon habang nakaunat ang mga bisig ng awa sa kanila; sapagkat ang mga bisig ng awa ay nakaunat sa kanila, at ayaw nila; sila na binalaan tungkol sa kanilang kasamaan at gayon man ay ayaw nilang tumalikod mula sa mga yaon; at inutusan silang magsisi at gayon man, ayaw nilang magsisi.

Mosiah 16:13–15

Kayo ay kinakailangang magsisi, at turuan ang mga tao na ang batas ni Moises ay isang anino ng pagtubos na darating lamang sa pamamagitan ni Cristo ang Panginoon, ang Walang Hanggang Ama.

At ngayon, hindi ba’t kayo ay dapat na manginig at magsisi ng inyong mga kasalanan, at pakatandaan na tangi at sa pamamagitan lamang ni Cristo kayo ay maaaring maligtas? Samakatwid, kung itinuturo ninyo ang mga batas ni Moises, ituro rin na ito ay anino ng mga yaong bagay na darating— Ituro sa kanila na darating ang pagtubos sa pamamagitan ni Cristo, ang Panginoon, na siya ring Amang Walang Hanggan. Amen.