Ang Pag-unti at Pagbagsak ng Mga Nephita

Ang Labanan sa Boaz

Mormon 4:16–18

Matapos ang isang dekada ng kapayapaan, ang mga Lamanita ay nagtipon ng isang napakalaking hukbo, lumusob papunta sa mga lupain sa kahilagaan, at nagsimulang mapalis ang mga Nephita.

At ang mga Lamanita ay hindi na muling sumalakay pa sa mga Nephita hanggang sa ikatatlong daan at pitumpu at limang taon. At sa taong ito, sila ay muling sumalakay sa mga Nephita nang buo nilang lakas, at hindi sila mabilang dahil sa kalakihan ng kanilang bilang. At magmula sa panahong ito, ang mga Nephita ay hindi na nagkaroon pa ng kapangyarihan laban sa mga Lamanita, kundi nagsimulang mapalis nila maging katulad ng hamog sa harapan ng araw.

Mormon 4:19–20

Ang mga Lamanita ay nagmartsa papunta sa Kapanglawan, kung saan ang kakila-kilabot na labanan ang sumunod; Ang mga Nephita ay naitaboy mula sa Kapanglawan, at umurong sa lunsod na tinatawag na Boaz, kung saan sa kabila ng pagsalakay ng mga Lamanita, ay naging matagumpay silang maipagtanggol ang kanilang sarili.

At ito ay nangyari na, na ang mga Lamanita ay sumalakay sa lunsod ng Kapanglawan; at nagkaroon ng lubhang masidhing labanan sa lupain ng Kapanglawan; kung saan kanilang nagapi ang mga Nephita. At muli silang tumakas mula sa kanilang harapan, at sila ay nakarating sa lunsod ng Boaz; at doon sila humarap nang buong katapangan laban sa mga Lamanita, kung kaya’t hindi sila nagapi ng mga Lamanita hanggang sa muli silang sumalakay sa ikalawang pagkakataon.

Mormon 4:21–22

Nagsagawa ng pangalawang pagsalakay ang mga Lamanita sa Boaz, kung saan nasakop nila ang mga Nephita, at muling inialay ang mga kababaihan at mga bata sa mga diyus-diyusan.

At nang sila ay sumalakay sa ikalawang pagkakataon, ang mga Nephita ay naitaboy at napatay sa isang lubhang malupit na pagkatay; ang kanilang kababaihan at kanilang mga anak ay muling inialay sa mga diyus-diyusan. At ito ay nangyari na, na ang mga Nephita ay muling tumakas mula sa kanilang harapan, kasama ang lahat ng nanahanan, kapwa sa mga bayan at nayon.

Mormon 4:23

Si Mormon, na ngayon 65 na taong gulang na at nakikita na ang bansang Nephita ay nasa bingit ng pagbagsak, ay nagtungo sa burol Shim, kung saan kinuha niya ang lahat ng mga talaan ng mga Nephita.

At ngayon ako, si Mormon, nakikitang malapit nang maibagsak ng mga Lamanita ang lupain, kaya nga, ako ay nagtungo sa burol ng Shim, at kinuha ang lahat ng talaang ikinubli ni Amaron ayon sa Panginoon.