Bukod dito, ang salita ng Panginoon ay nagsabi sa akin:
Kumuha ka ng isang malaking balumbon ng papel,
at sulatan ito sa pamamagitan ng panulat ng tao,
hinggil kay Maher-salalias-baz.
At kumuha ako ng mga tapat na saksi upang magtala, si Uria na saserdote, at si Zekarias na anak ni Jeberekias.
At nagtungo ako sa propetisa; at naglihi siya at nagsilang ng isang anak na lalaki. Pagkatapos sinabi sa akin ng Panginoon:
Tawagin siya sa pangalang Maher-salalias-baz.
Sapagkat masdan,
hindi matututong magsalita ang bata ng:
Ama ko, at ina ko,
bago ang mga kayamanan ng Damasco
at ang mga sinamsam ng Samaria
ay aagawin sa harapan ng hari ng Asiria.
Muling nangusap sa akin ang Panginoon, nagsasabing:
Yaman din lamang na tinanggihan ng mga taong ito
ang tubig ng Siloa na marahang umaagos,
at nangagsasaya kay Resin at sa anak ni Remalias;
Ngayon samakatwid, masdan,
ang Panginoon ay magpapadala sa kanila
ng malakas at bumubugsong tubig ng ilog,
maging ang hari ng Asiria at ang kanyang buong kaluwalhatian;
na anupa’t aapaw sa lahat ng kanyang pampang,
at babaha sa lahat ng kanyang baybayin.
At magdaraan sa Juda;
babaha at tataas
ang tubig hanggang sa leeg;
at sasakupin ng kanyang mga pakpak
ang buong kalawakan ng iyong lupain,
O Emmanuel.
Kayo ay magsama-sama,
O kayong mga tao,
at kayo ay magkakawatak-watak;
At makinig kayong lahat na nasa malalayong bansa;
mangagbigkis kayo,
at kayo ay magkakawatak-watak din;
Mangagbigkis kayo,
at kayo ay magkakawatak-watak din.
Magsanggunian kayo,
at mawawalang-saysay ito.
Magsalita kayo,
at walang mangyayari.
Sapagkat nasa amin ang Diyos.