Ang Pagsipi ni Nephi sa Isaias

Ang Pagmamana ng Ari-arian ng Mga Pinuno ng Jerusalem at Juda

2 Nephi 13:1–5

Ang mga pinuno ng gobyerno, militar, edukasyon, at relihiyon ng Jerusalem at Juda ay pababagsakin, at ang bansa ay mauuwi sa di matutulang paghahari sa kamay ng mga bata.

Sapagkat masdan,
ang Panginoon,
ang Panginoon ng mga Hukbo,
ay aalisin sa Jerusalem,
at sa Juda,
ang lahat ng uri ng kabuhayan,
ang lahat ng tulong sa tinapay,
at ang buong pamamalagi ng tubig—

Ang makapangyarihang lalaki,
at ang lalaking mandirigma,
ang hukom,
at ang propeta,
at ang manghuhula,
at ang matanda;

Ang kapitan ng limampu,
at ang marangal na tao,
at ang tagapayo,
at ang bihasang salamangkero,
at ang dalubhasang mananalumpati.

At mga bata ang ibibigay ko sa kanila na maging kanilang mga prinsipe,
at pamumunuan sila ng mga sanggol.

At magiging api ang mga tao,
bawat isa dahil sa iba,
at bawat isa dahil sa kanyang kapwa;
ang bata ay magpapalalo laban sa matanda,
at ang hamak laban sa marangal.

2 Nephi 13:6–7

Ang mga mamamayan ay magtatalo ng may galit para magtalaga ng pinuno, subalit sa walang kabuluhan.

Kapag ang lalaki ay hahawak
sa kanyang kapatid sa bahay ng kanyang ama,
at sasabihin:

Ikaw ay may balabal,
ikaw na ang aming maging pinuno,
at huwag mong pangasiwaan sa iyong kamay ang pagkasirang ito—

Manunumpa siya sa araw na iyon, magsasabing:

Hindi ako magiging manggagamot;
sapagkat sa aking bahay ay wala kahit tinapay, ni balabal;
huwag ninyo akong gawing pinuno ng mamamayan.

2 Nephi 13:8–12

Ang kasamaan ng Jerusalem at Juda ay magdadala ng mga sumpa para sa masasama; subalit ang mabubuti ay hindi kinakailangang matakot.

Sapagkat ang Jerusalem ay nawasak,
at ang Juda ay bumagsak,
dahil ang kanilang mga dila
at ang kanilang mga gawa ay laban sa Panginoon,
upang galitin ang mga mata ng kanyang kaluwalhatian.

Ang kaanyuan ng kanilang pagmumukha ay sumasaksi laban sa kanila,
at tanyag ang kanilang mga kasalanan tulad ng Sodoma,
at hindi nila ito maitatago. Sa aba sa kanilang mga kaluluwa,
sapagkat ginantimpalaan nila ang sarili ng kasamaan!

Sabihin ninyo sa mabubuti, na ito ay makabubuti sa kanila;
sapagkat kakanin nila ang bunga ng kanilang mga gawa.

Sa aba sa masasama,
sapagkat masasawi sila;
sapagkat tatanggapin nila ang gantimpala ng mga gawa ng kanilang mga kamay.

At sa aking mga tao,
mga bata ang maniniil sa kanila,
at mga babae ang mamumuno sa kanila.
O aking mga tao,
ang mga umaakay sa iyo ang siyang nagliligaw sa iyo
at sumisira sa iyong daraanan.

2 Nephi 13:13–15

Hahatulan ng Diyos at sasawayin ang masasama.

Ang Panginoon ay tatayong magtanggol,
at tatayo upang hatulan ang mga tao.

Huhukom ang Panginoon
na kasama ang matatanda ng kanyang mga tao
at ang mga prinsipe niyon;
sapagkat winasak ninyo ang ubasan,
at ninakawan ninyo ang maralitang nasa inyong mga tahanan.

Ano ang ibig ninyong sabihin?
Hinagupit ninyo ang aking mga tao nang pira-piraso,
at dinurog ang mukha ng mga maralita,
wika ng Panginoong Diyos ng mga Hukbo.