Ang Dakila at Huling Hain • Aklat ni Mormon Online

Alma 34:9

Ang isang tao sa pagkahulog ay itinakda upang masawi maliban kung ang isang pagbabayad-sala ay maisagawa.

Sapagkat kinakailangan na ang pagbabayad-sala ay maisagawa; sapagkat ayon sa dakilang plano ng Diyos na Walang Hanggan, kinakailangan na may isang pagbabayad-salang gawin, at kung hindi, ang buong sangkatauhan ay tiyak na hindi makaiiwas na masawi; oo, lahat ay naging matigas; oo, lahat ay nahulog at nangaligaw, at tiyak na masasawi maliban sa pamamagitan ng pagbabayad-sala na kinakailangang maisagawa.

Alma 34:10

Isang walang katapusan at walang-hanggang dakila at huling hain ay hinihingi.

Sapagkat kinakailangang magkaroon ng isang dakila at huling hain; oo, hindi isang paghahain ng tao, ni ng hayop, ni ng anumang uri ng ibon; sapagkat hindi ito magiging hain ng tao; kundi kinakailangan na ito’y isang walang katapusan at walang hanggang hain.

Alma 34:11

Ang sakripisyo ng isang tao ay hindi makapagbabayad para sa kasalanan ng iba.

Ngayon, walang sinumang taong makapaghahain ng kanyang sariling dugo na magbabayad-sala para sa mga kasalanan ng iba. Ngayon, kung ang isang tao ay pumaslang, masdan ang atin bang batas, na makatarungan, ay kukunin ang buhay ng kanyang kapatid? Sinasabi ko sa inyo, Hindi.

Alma 34:12

Ang mga tao ay mananagot para sa kanilang sariling mga kasalanan, kaya nga walang kukulang sa walang hanggang pagbabayad-sala ang makapagbabayad para sa mga kasalanan ng sanlibutan.

Ngunit hinihingi ng batas ang buhay niya na pumaslang; anupa’t walang anumang bagay na kukulangin sa walang hanggang pagbabayad-sala ang makasasapat para sa mga kasalanan ng sanlibutan.

Alma 34:13

Ang dakila at huling hain ang tutupad sa batas ni Moises, at magtatakda ng katapusan sa paghahain ng dugo.

Kaya nga, kinakailangang magkaroon ng isang dakila at huling hain, at kung magkagayon ay magkakaroon, o kapaki-pakinabang na magkaroon, ng pagtigil ng pagbuhos ng dugo; at sa gayon ang mga batas ni Moises ay matutupad; oo, ito ay matutupad na lahat, bawat tuldok at kudlit, at walang anumang mawawala.

Alma 34:14

Ang buong batas ni Moises ay tumutukoy sa walang katapusan at walang hanggang dakila at huling hain ng Anak ng Diyos.

At masdan, ito ang buong kahulugan ng batas, bawat mumunting bahagi ay nakatuon sa yaong dakila at huling hain; at yaong dakila at huling hain ay ang Anak ng Diyos, oo, walang katapusan at walang hanggan.

Alma 34:15

Ang layunin ng huling hain na ito ay makapagdala ng kaligtasan sa mga naniniwala sa pamamagitan ng pagpapangyari na ang awa ay mangibabaw sa katarungan, at magpahintulot para sa pananampalataya na tungo sa pagsisisi.

At sa gayon siya magdadala ng kaligtasan sa lahat ng yaong maniniwala sa kanyang pangalan, ito ang layunin ng huling haing ito, upang madala ang mga sisidlan ng awa, na nangingibabaw sa katarungan, at nagbibigay ng daan sa mga tao upang sila ay magkaroon ng pananampalataya tungo sa pagsisisi.

Alma 34:16

Tanging ang pananampalataya tungo sa pagsisisi ang magkakaloob ng karapatan sa uri ng awa na magbibigay-kasiyahan sa katarungan.

At sa gayon mabibigyang-kasiyahan ng awa ang hinihingi ng katarungan, at yayakapin sila ng mga bisig ng kaligtasan, samantalang siya na hindi magkakaroon ng pananampalataya tungo sa pagsisisi ay nakalantad sa buong batas na hinihingi ng katarungan; anupa’t siya lamang na may pananampalataya tungo sa pagsisisi ang madadala sa dakila at walang hanggang plano ng pagtubos.