Ang Digmaan Laban sa Jerusalem

2 Nephi 17:1

Ang hari ng Syria at ang hari ng Israel ay hindi matagumpay sa pag-atake sa Jerusalem (Juda).

At ito ay nangyari na, na sa mga araw ni Achas na anak ni Jotam, anak ni Uzzias na hari sa Juda, na si Resin na hari sa Siria, at si Peka anak ni Remalias, hari sa Israel, ay umahon upang lusubin ang Jerusalem, subalit hindi nanaig laban dito.

2 Nephi 17:2

Nang malaman ni Juda na ang Siria ay nakianib kay Ephraim, ito ay natakot.

At nabalita sa sambahayan ni David, sinasabing:

Ang Siria ay nakipagsabwatan sa Ephraim. At ang puso niya ay nanginig, at ang puso ng kanyang mga tao, na tulad ng mga punungkahoy sa kakahuyan na pinakikilos ng malakas na hangin.

2 Nephi 17:3–6

Sinabi ng Diyos kay Isaias na humayo at salubungin si Achas, ang hari ng Juda, at sabihan siya na huwag matakot at balaan ang mga yaong nagbabanta laban sa kanya.

Pagkatapos sinabi ng Panginoon kay Isaias:

Humayo ngayon upang salubungin si Achas, ikaw at si Sear-jasub na iyong anak, sa dulo ng padaluyan ng tipunan ng tubig sa itaas sa lansangan ng parang ng tagalaba; At sabihin sa kanya:

Ikaw ay makinig,
at tumahimik;
huwag matakot,
ni manlupaypay man ang iyong puso
sa harapan ng dalawang sulong
ito na umuusok,
sa masidhing galit ni Resin at Siria,
at sa anak ni Remalias.

Dahil ang Siria, Ephraim,
at ang anak ni Remalias,
ang nagbalak ng masama laban sa iyo, nagsasabing:

Umahon tayo laban sa Juda
at ligaligin ito,
at ating pasukin sila,
at maglalagay ng hari sa gitna niyon,
oo, ang anak ni Tabel.

2 Nephi 17:7–9

Tiniyak ng Diyos kay Isaias na ang Siria at Ephraim sa kalaunan ay babagsak.

Ganito ang wika ng Panginoong Diyos:

Hindi ito magkakagayon,
ni hindi ito mangyayari.

Sapagkat ang ulong lunsod ng Siria ay Damasco,
at ang pangulo ng Damasco ay si Resin;
at sa loob ng animnapu at limang taon
ay magkakawatak-watak ang Ephraim, at hindi na ito magiging bayan.

At ang ulong lunsod ng Ephraim ay Samaria,
at pangulo ng Samaria ang anak na lalaki ni Remalias.

Kung hindi kayo maniniwala
ay tiyak na hindi kayo mananatili.

2 Nephi 17:10–11

Sinabi ng Panginoon kay Achaz na humiling ng kakatwang palatandaan.

Bukod dito, muling nangusap ang Panginoon kay Achas, nagsasabing:

Humingi ka ng palatandaan mula sa Panginoon mong Diyos; humingi maging sa kailaliman, o sa kaitaasan.

2 Nephi 17:13–17

Ang Panginoon gayunpaman ay nangakong magbibigay ng palatandaan: Isang birhen ang magsisilang sa isang batang lalaki.

At sinabi niya:

Masdan ninyo ngayon, O sambahayan ni David; diyata’t maliit na bagay sa inyo ang pagurin ang mga tao, subalit inyo bang papagurin din ang aking Diyos?

Samakatwid, ang Panginoon sa kanyang sarili ang magbibigay sa inyo ng palatandaan—Masdan, maglilihi ang isang birhen, at magsisilang ng isang anak na lalaki, at tatawagin ang kanyang pangalang Emmanuel. Mantikilya at pulot ang kanyang kakainin, upang malaman niyang tumanggi sa kasamaan at piliin ang mabuti.

Sapagkat bago matutong tumanggi ang bata sa kasamaan at piliin ang mabuti, ang lupaing iyong kinasusuklaman ay pababayaan ng kapwa niyang mga hari. Pararatingin sa iyo ng Panginoon, at sa iyong mga tao, at sa sambahayan ng iyong ama, ang mga araw na kailanman ay hindi pa sumapit magmula nang mapahiwalay ang Ephraim sa Juda, ang hari ng Asiria.

Ang Pagsipi ni Nephi sa Isaias