Ang Mga Sanga Mula Kay Jesse

At may lalabas na usbong sa puno ni Jesse,
at lilitaw ang isang sanga mula sa kanyang mga ugat.

At mapapasakanya ang Espiritu ng Panginoon,
ang diwa ng karunungan at pang-unawa,
ang diwa ng pagpapayo at kapangyarihan,
ang diwa ng kaalaman at ang takot sa Panginoon;

At kalulugdan niya
ang pagkatakot sa Panginoon;
at hindi siya hahatol nang naaayon sa nakikita ng kanyang mga mata,
ni hindi rin hahatol ng alinsunod sa naririnig ng kanyang mga tainga.

Subalit hahatulan niya ang mga maralita nang may katwiran,
at sasaway sa mga maaamo nang pantay-pantay;
at kanyang hahampasin ang mundo ng pamalo ng kanyang bibig,
at sa hininga ng kanyang mga labi ay papatayin niya ang masasama.

At magiging bigkis ng kanyang baywang ang katwiran,
at katapatan ang pamigkis ng kanyang balakang.

At maninirahan din ang lobo na kasama ang kordero,
at mahihiga ang leopardo na kasiping ang batang kambing,
at ang guya at ang batang leon at ang patabain ay magkasamang manginginain;
at aakayin sila ng isang maliit na bata.

At manginginain ang baka at ang oso;
at ang kanilang mga anak ay sama-samang mahihiga;
at kakain ng dayami ang leon na tulad ng baka.

At ang pasusuhing bata ay maglalaro sa lungga ng ahas,
at ipapasok ng sanggol na kaaawat pa lamang ang kanyang kamay
sa lungga ng ulupong.

At hindi sila mananakit ni maninira sa lahat ng aking banal na bundok,
sapagkat mapupuno ang mundo ng kaalaman sa Panginoon,
tulad ng pagkapuno ng tubig sa karagatan.

At sa araw na yaon ay sisibol ang isang ugat ni Jesse,
na tatayong pinakasagisag sa mga tao;
dito ang mga Gentil ay sasangguni;
at magiging maluwalhati ang kanyang katiwasayan.